ავტორის შესახებ
მიხო (მიხეილ) ანზორის ძე მოსულიშვილი — ქართველი მწერალი, ღირსების მედლის კავალერი და გალას პრემიის ლაურეატი.
მიხო მოსულიშვილი დაიბადა 1962 წლის 10 დეკემბერს. დედა, ნუნუ შაქროს ასული ვარაზაშვილი (1943 – ) არის დიასახლისი, ხოლო მამა, ანზორ მიხეილის ძე მოსულიშვილი (4.04.1937 - 25.05.2021) იყო მძღოლი.
1986 წელს დაამთავრა თბილისის სახელმწიფო უნივერსიტეტის (თსუ) გეოგრაფია-გეოლოგიის ფაკულტეტი. 1981—1984 წლებში სწავლობდა უნივერსიტეტის მეორად ფაკულტეტზე, სპეციალობით — კინოდრამატურგია (ტატა თვალჭრელიძის, ერლომ ახვლედიანის და დავით აგიაშვილის სახელოსნო).
პირველი ნაწარმოები ტყის კაცი გამოაქვეყნა ჟურნალ „ცისკრის“ დამატება „ნობათში“ 1984 წელს. გამოცემული აქვს რომანების, მოთხრობების, პიესებისა და თარგმანების ოცამდე წიგნი. მისი პიესების მიხედვით დადგმულია სპექტაკლები საქართველოს სხვადასხვა თეატრებში, ასევე ტელევიზიასა და რადიოში.
მიხო მოსულიშვილის ნაწარმოებები თარგმნილია ლატვიურ, ინგლისურ, გერმანულ, სომხურ და რუსულ ენებზე.
2004 წლიდან მიხო მოსულიშვილი იყო ოცამდე წიგნის რედაქტორი, მათ შორის, გოდერძი ჩოხელის ნოველების რჩეულისა და ფიზიკოსის, ლიგური მოსულიშვილის მემუარებისა, თუმცა მის მიერ მომზადებული წიგნების უმეტესობა პოეტური და სადებიუტო კრებულებია.
